MIRROR前晚（1月1日）全員出席叱吒頒獎禮，連續3年奪「我最喜愛組合」，成員姜濤憑歌曲《濤》奪得兩個獎，包括叱吒十大歌曲以及我最喜愛的歌曲大獎，今次已是他連續第4年獲最喜愛歌曲。大家除了留意姜濤的表演和感言外，其身形亦受關注。身在台灣的杜汶澤在社交平台發千字長文評姜濤身形，指他「真係肥」，認為對方是「壓力肥」，並勸他放長假減壓。

杜汶澤直指姜濤「真係肥」，稱「偶像唔應該肥」，而每個偶像一紅會好大壓力，這個是定律，又以謝霆鋒陳冠希作例子：「好似以前謝霆鋒細個嗰陣仲癲過龍心啦！撞到啲車爛鳩晒，人就係咁㗎啦，唔適應吖嘛！陳冠希咪又係咁，亂屌河馬，而家同個女幾溫馨呀。」

杜汶澤憶述多年前與姜濤有過一面之緣，指他當時的笑容已不復見，「好多年前我有次響電視台做嘢，響後台見到佢，佢係一個好有禮貌嘅小朋友，好可愛。但係而家見唔到佢呢種笑容。」

他指行內人同身邊人無人同佢講真說話，「夥計就更加唔會出聲啦，好似劉德華咁，成日着條吊腳褲鬼咁核突，圍住佢嗰啲擦鞋仔個個都話靚呀靚呀，咁佢咪信囉！邊個夠膽講真說話㗎？死咗啦。」所以呢，他覺得姜濤的同事一定有讚他已經瘦了好多，並忠告對方：「細侄你記住，邊個咁同你講邊個就係害Ｘ你嗰個。」最後，杜汶澤奉勸大家如果真係錫姜濤，就應該勸他休息，給自己一個沉澱機會及放鬆的空間，思考人生，將來可以走更遠的路。