端午節將至，中華電力（中電）總裁羅嘉進（Joe）聯同勞工及福利局局長孫玉菡率先與200名仁愛堂老友記提前慶祝佳節，二人還即場跟隨老友記學用舊衫升級再造。Joe與孫局長話佢哋平時好少做手作仔，不過佢哋好快跟兩位老友記學師，仲整咗一個糉形布袋仔，實行將端午元素融入呢份升級再造嘅作品，夠晒應節。

　兩位師傅麥婆婆、陳婆婆，早前同其他老友記一齊參加中電的升級再造工作坊，把中電義工收集的400件舊衫褲，加入自己的創意和手藝，製作獨一無二的手織坐墊及圍裙。一班老友記仲好自豪將自己得意之作俾Joe同孫局長睇。

　麥婆婆退休前做製衣，平時喺屋企都鍾意車衫同縫紉。今次係佢第一次用舊牛仔褲改造圍裙，連佢自己都估唔到可以整到咁靚，仲話會繼續研究，睇吓其他舊衫可以點樣升級再造，變為新嘢嚟用。難怪局長都話一班老友記肯去試新嘢，整到咁多有創意嘅作品，真係「活到老，學到老」嘅最佳寫照。Joe大讚班老友記創意爆棚，將舊衫「重生」變成第二個用途，佢都多謝一班中電義工陪老友記一齊升級再造，仲教埋慳電節能嘅知識。

　頂圖圖説：中電總裁羅嘉進（右一）、勞工及福利局局長孫玉菡（右二）、中電企業發展總裁莊偉茵（左一）一同欣賞長者升級再造的作品。

　羅嘉進（右二）、孫玉菡（左二）與麥婆婆（左一）及陳婆婆（右一）一同製作糉形布袋，將端午元素融入升級再造，與長者慶祝端午節。

　麥婆婆（左四）成功將舊牛仔褲改造成圍裙及糉形布袋，深受鼓舞，會繼續研究如何將更多舊衣物改造成為實用物品。