一名外賣員在11月25日於社交媒體群組發文指工作期間發現火警，事件發生在大埔宏福苑大火的前一個晚上。他講述到富蝶村珍蝶樓送外賣時發現垃圾房起火冒煙，與街坊合力將火救熄，其後消防到場，事件中沒有人受傷，亦避免一場火災；網民紛紛激讚，說要向外賣大哥：致敬！

    外賣員留言說明經過：「今晚送外賣去富蝶村珍蝶樓，搭(車立)上29樓送某單位，搭到中途(車立)響警報同響警鐘，幸好到29樓開(車立)門，冇困(車立)咁張單話掛門口就可以了，我完成張單後，發覺唔對路，有陣煙味(唔通火燭？)已經有d住戶開始走出黎睇咩事，垃圾房有d白煙，咁我自己推斷(d煙係樓下升上黎，唔係依層)，我跑樓梯落下層睇，以有個阿叔拎住枝消防喉對住垃圾房，但係冇火原，我同阿叔講唔係依層，要再落，我同阿叔講一齊落，有d咩事互相照應，阿叔：好。終於落到25樓，火原係垃圾房入面，埸面好大煙，我同阿叔反應好快，阿叔開消防門櫃，佢太急，用拳頭打水龍頭塊玻璃片，我：唔好用手，旁邊有枝細錘仔。咁爆開左，我就拉左水龍頭出黎，有個哥仔幫到手，拎住水龍頭匆個去垃圾房，我拉喉，阿叔開水制，我叫哥仔：濕件衫揞口呀。佢一開垃圾房個門，d濃煙湧曬出嚟走廊，佢吸左兩啖濃煙搞唔掂，我同阿叔接力射水，濃煙向上升，我地踎咗喺度(避免吸入過量濃煙)，繼續救火嘅時候，我見到有個女人用毛巾揞住個口企係濃煙走廊中間，我：快d走呀，企係到仲咩呀，落樓梯呀。根住阿叔煙到眼，睇唔清楚搞唔掂，接力等我黎，你去樓梯避一避，叫其他幫到手嘅，拉多一枝喉上黎，依到我頂住先(我戴住頭盔有面鏡頂住d煙)，最終找到火原原頭係其中一個垃圾桶，我原住原頭射水，最後比我救熄咗喇，救熄咗，消防員先剛剛到，我：交比你地喇！(出哂汗的我，行20幾層樓梯落樓，見到d阿婆阿伯帶住d孫仔行落樓，我救熄咗，消防員善後緊，返屋企啦，咪行喇)，後感(當然，要判斷自己做唔做到，可唔可行，幸運地住戶發揮合作精神，先可快速救熄場火，香港人，獅子山精神)」

    外賣員事後在社交媒體帖上手握啤酒的相片，表示鬆一口氣要「飲番杯」，網民紛紛留言點讚：「你呢啲先叫做真英雄！」、「見義勇為，致敬！」、「有勇有謀，係勁喎！」、「勁揪，你幫咗好多人！」、「無你無屋企返，多謝你！！！」、「真心英雄！」「富蝶邨民多謝你哋咁拔刀相助，祝你哋好心人一世平安！」、「英雄！乾杯！」，「多謝你們沒袖手旁觀，令到社區更美」。（記者 區天海）