網民日前偕友人到天后一間火鍋店打邊爐，未料天花竟有懷疑是蛆蟲墮下，跌落火鍋湯中，網民忙與友人結帳離開。影片上載社交平台，網友看後亦感震驚，留言：「天花板藏屍！？」

    樓主留言：「諗咗晚，都係寫出嚟。

    昨晚同兩個老友打邊爐，其中一位揀咗天后呢間火鍋，食物可以接受，但最驚嚇係食到尾聲，忽然有嘢跌落個鍋。

    起初不以為然，朋友仲以為係滴水，諗住繼續，我比較小心，向上望下，赫然見到吊燈上面電掣位，有幾條小蟲（我唔肯定係咪蛆蟲）爬出嚟，之後一條跌落枱，另外兩條噗通噗通咁跌落湯底。

    此情此景，當然即刻走人。因為朋友一早講咗請客，就由佢叫伙記買單，一男一女都好似冇乜反應，朋友問到，亦冇乜想補償嘅講法。其實我冇所謂，只係想盡快走人，最後朋友再問，伙計話送一set四支啤酒，我哋應咗一句就畀錢走人。

    老友呢排做嘢好辛苦，呢餐主要係聽下佢訴苦水，估唔到最後嚇一嚇；至於呢間火鍋係第一次食，亦肯定係最後一次。諗咗晚，都係寫出嚟。」

    網民留言說：「唔通天花板藏屍？！」「要報食環，分分鐘係從死老鼠吽出嚟。」「請你真係要報1823…真」「搞唔掂，仲衰過老鼠」「嗰個位有蛆蟲，即係上面天花有屍體，死老鼠 maybe。」「好恐怖！直情成間店唔要得！可能係我上年有親人、就係屍體發現案….. 啲蟲就係甘，我個陰影仲係度，我諗我見到會即刻發癲都似（樓主、真係勁！仲可以甘冷靜影蟲）。」（記者 區天海）